A Whisper

ايه يا عم التدوينات قصيرة كده ليه؟ الواحد هيتعب معاك على ما يجمع القصة.

على العموم جميل لحد كده.

سؤال بقى لما كنت بتدرس قرآن في المدرسة كنت بتبقى فاهم أصلا ايه اللي بيتقال؟ و الكلام الغير مفهوم كنت بتتعامل معاه ازاي؟

أنا بحاول افتكر امتى بيبتدي الطلبة يتعاملوا مع القرآن على أن ليه قدسية و مش قادر أحدد النقطة، لكن فاكر كويس أن كان ثلاث أربع الكلام بنحفظه كأنه كلام أجنبي (يعني من غير فهم مفردات حتى). الموضوع ده كان عجيب جدا بالنسبة لي لأن باقي النصوص و المواد كانت مفهومة و محاولات الأساتذة للشرح كانت واهية تماما. و طبعا اختيار النصوص كان برضه عجيب جدا، أنا فاكر كويس أننا درسنا و بكثافة آيات فيها وصف تفصيلي لعذاب جهنم أو للدمار المصاحب ليوم القيامة في رابعة ابتدائي، و دي بالذات المدرسين كانوا بيتفننوا في شرحها. حتى آيات وصف نعيم الجنة كانت اختيار عجيب فأغلبها صعب على طفل فهمه أو تفهم أهميته (تخيل أنك بتقول لعيل عنده 9 سنين خليك كويس عشان يبقى عندك سندن و استبرق كثير و لقيت مسمعتش الكلام يومك هيبقى عبوس قمطرير و هتشرب حديد مغلي كل يوم).

كلامي طبعا ملوش أي علاقة باللي أنت بتحكي فيه لكن اكتشفت أن عمري ما سألت حد مسلم أو مسيحي كان شايف القرآن في ابتدائي ازاي. غالبا لقطت بدري أن التعبير عن عدم فهم النصوص الدينية بالذات عواقبه وخيمة.

في أنتظار الحلقات التالية، خبرتك مع الطوائف والأديان مشوقة بالنسبة لي لقراءتها....

اه فعلا مشوقة القصة بتاعتك
اى تجربة انسانية فهى مشوقة.. ويمكن اكتر كمان بالنسبة لى لانك بتتكلم عن شئ ماعشتوش
لانى تقريبا فضلت فى بيئة اسلامية خالصة لحاااد بداية الجامعة

احم...

ويمكن عشان كدة مستعجبة سؤال علاء مثلا؟
لان مافتكرشى يوم حسيت الوصف فى القرآن غريب
يعنى حتى لو مش فاهمة "سندس واستبرق".. ف على الاقل عارفة ان الجنة فيها "ما لا عين رأت ولا اذن سمعت"... فمايهمنيش التفصيل المهم المجمل
بل ان تلاقى اغلبنا كنا بنستنى حصص الدين بالذات عشان حابنها

احتمال على حسب الجو العام المحيط وطريقة تقبلك ليها نتيجة لاختلاط الواحد بفئة معينة؟

بالقطارة !!! عايزاك كدة تاخد راحتك و تكتبلنا القصة حتة حتة بالقطارة, و ادينى قاعدة اهو مستنية و ربنا يسهل , يا هافطس, ياما القصة هتكتمل

هايل, بجد مستنية الباقى

متزتعجلش على رزقك يا عم علاء. الحقيقة فيه بعض التفاصيل بتجاهلها أو أحياناً بأنسى أذكر البعض الأخر وعشان كده بكتب براحة وبمزاج لما أجمع فى دماغى النقاط الأساسية اللى عشتها فى هذه الخبرة وإيه اللى أحب أكتب وإيه اللى مش ممكن أكتبه.

أما بخصوص سؤالك فأنا فى الغالب كنت مش بفهم أى حاجة متعلقة بالنصوص القرآنية من أول مرة أبداً لكن البركة بقى فى المدرسين وفى كتاب سلاح التلميذ والأضواء. كانت كل آية بتاخد وقت كبير عقبال ما تركب على المعنى وتركز فى دماغى ده بالإضافة إنى مكنتش شاطر فى الحفظ على وجه العموم. لكن فى إعتقادى، إن فهم أو عدم فهم النصوص القرآنية مش مرتبط بقدسية القرآن ولا مرتبط بعمر معين أو نضج فكرى خاص. فالقدسية لا تُستبط بل تُمنح بمعنى أن أنها لا تعبر عن نفسها ولكن يمنحها من يؤمن بها. وفى الغالب فإن الأطفال أكثر إستقبالاً لقدسية الأشياء من الكبار.

أنا مش فاكر أى نص قرآنى من اللى درسته فى إبتدائى أو إعدادى أو حتى ثانوى (رغم أن خبرتى فى ثانوى مختلفة زى ما هأقول بعدين) عشان أفتكر إذا كان فيه نص درسته عن الجنة أو لأ فبصراحة لم تدخل هذه النصوص فى عمق تكوينى الفكرى ولا النفسى سوى بردود فعل عامة بالاستغراب والاستهجان أحياناً. والغريب إن حتى مادة الدين المسيحى كمادة دراسية لم تساعدنى أو تبنى شيئاً يُذكر سوى ما يتعلق باللاهوت وهو ما كان يُدرًّس على مضض وبسطحية شديدة جداً وكان المدرسين غير مؤهلين للدخول فى مناقشات سفسطائية فكانت دائما تؤخذ الأشياء كما فى الكتاب وبدون فهم وخصوصاً إنه مفيش لا سلاح التلميذ ولا الأضواء لمادة الدين المسيحى

The eyewitness,
ربنا يخليك، بس متهيألى إنت عارف معظم التفاصيل دى وممكن تتدلُ بدلوك هنا وتجاوب على الأسئلة اللى بيزنقنى علاء بيها

لست أدرى،
أكيد خبرة كل شخص مختلفة بس بتمنى اللى هيقرأ يكون عنده قبول يسمع بدون أحكام.

ماعت،
أيوة كده، إدينى راحتى عشان أعرف أعبر بس إن شاء الله مش هتفطسى ولا حاجة طالما فيه التشجيع ده ومحسسنى إنى بكتب مذكرات فريدة من نوعها رغم إنى مش بكتب حاجة غريبة ومتأكد إن اللى عشته ده فيه كتير عاش زيه ويمكن إختبر حاجات أكتر وأعمق منى.